Ծնվել եմ Գառնիում, իսկ մանկությունս անցել է Արցախում՝ ջերմությամբ ու հիշողություններով լի միջավայրում։ Մասնագիտությամբ պատմության ուսուցչուհի եմ և միշտ հավատացել եմ, որ կրթությունը կարող է փոխել մարդու աշխարհը։ Իմ ճանապարհը հեշտ չի եղել․ պատերազմ, տեղափոխություններ, անորոշություն՝ Աղավնոյից Ստեփանակերտ, հետո՝ Երևան։ Բայց հենց այդ դժվարությունների մեջ ծնվեց մի լուսավոր գաղափար։ Երբ աղջիկս սկսեց հետաքրքրվել քաղցրավենիքով, ես չցանկացա նրան տալ անառողջ կոնֆետներ և սկսեցի ինքս պատրաստել՝ բնական ու վստահելի բաղադրիչներով։

Շուտով հասկացա, որ շոկոլադը կարող է լինել ոչ միայն քաղցրություն, այլ նաև խրախուսանք, խաղ ու սովորելու միջոց։ Այդպես ստեղծվեց «Լուսէ»-ն՝ կրթական շոկոլադների առաջին հայկական բրենդը, որտեղ երեխաները սովորում են գույներ, թվեր ու կենդանիներ խաղի միջոցով։ Այսօր Լուսէն պարզապես քաղցրավենիք չէ․ այն խաղ է, գիտելիք և ընտանեկան արժեքավոր ժամանակ։ Ճանապարհը դժվար էր՝ լի փորձություններով ու հիասթափություններով, բայց կանգ առնելը տարբերակ չէր։ 

Այսօր իմ նպատակը պարզ է՝ «Լուսէն» դարձնել կրթական աշխարհ, որտեղ երեխաները խաղում են, սովորում ու մեծանում արժեքներով՝ սկսած մայրիկի պարզ ցանկությունից՝ իր երեխային տալ լավագույնը։